د افغانستان د صنعت او سوداګرۍ وزارت وایي، د کابل له صنعتي نندارتون څخه ۳۰۰ زرو خلکو لیدنه کړې او شرکتونو د ۴۰۰ زره افغانیو په شااوخوا کې خپل محصولات پلورلي دي.
د دغه وزارت ویاند فواد احمدي نن یکشنبه (د وري ۸مه) ازادي راډیو ته وویل چې د صنعت او سوداګرۍ وزارت د۱۴۰۰ لمریز کال او نوروز جشن په مناسبت د کابل په چهلستون باغ کې درې ورځنی صنعتي نندارتون جوړ کړی و چې څه د پاسه درې سوه زرو کابل ښاریانو ورڅخه لیدنه وکړه.
په دې نندارتون کې د ۶۰ شرکتونو له خوا، غالۍ، کرنیز محصولات، لاسي صنایع ، زعفران، ودانیز توکي، روغتیايي توکي، وچې میوې، قیمتي او نیمه قیمتي ډبرې، کلتوري او هنري اثار په سلو غرفو کې نندارې وړاندې شول چې د کابل ښاریانو له خوا يې تود هرکلی وشو.
دغه درې ورځنۍ نندارتون نن پای ته ورسید.
په دغه نندارتون کې د هېواد بېلابېلو ۶۰ شرکتونو ګډون کړی وو.
د سوداګرۍ او صنعت وزارت ډاډ ورکوي چې کورني محصولاتو ته د بازار موندنې لپاره به ورته نور نندارتونونه هم جوړ کړي.