په مسکو کې د افغانستان د سولې په اړه غونډه روانه ده او ګډونوالیې د سولې د روان بهیر پر چټکتیا او ورته نورو مسایلو خبرې کوي.
د راپورونو له مخې د روسیې د بهرنیو چارو وزیر سرګي لاوروف د غونډې د ویناوالو له ډلې و او نوموړي له طالبانو غوښتي چې د دوحې هوکړې ته ژمن پاته شي.
د غونډې له جریانه لا ډېر جزئیات نهدي خپاره شوي، خو اټکل دا دی چې د ورځې په پای کې د شویو بحثونو په اړه یوه اعلامیه خپره شي.
غونډه کې د افغان دولت او طالبانو لوړپوړو پلاویو برخه اخیستې او پر دې سربېره د افغانستان د سولې لپاره د امریکا ځانګړی استازی زلمی خلیلزاد هم ورغلی دی.
د سولې د روان بهیر د چټکتیا په هدف دا غونډه داسې مهال جوړه شوې چې ټاکل شوې نږدې راتلونکي کې بله ورته غونډه په ترکیه کې جوړه شي.
دا دواړه غونډې د افغانستان لپاره مهمې بلل کېږي، ځکه داسې مهال جوړېږي چې له دغه هېواده د امریکایي ځواکونو د وتلو مهلت رانږدې شوی او بل دا چې امریکایانو د قدرت د وېش لپاره افغان دولت ته یوه طرحه سپارلې ده.