نا معلومه وسله والو نن یکشنبه (د کب ۲۴مه) سهار جلال اباد کې یو پولیس وواژه او برید کوونکي له سیمې وتښتېدل.
د ننګرهار ولایت مطبوعاتي دفتر پیښه تایید کړې او ویلې یي دي، پېښه سهار اته بجې وشوه او وژل شوی کس د برېښنا ریاست ساتونکی و.
عیني شاهدانو ازادي راډیو ته ویلي، برید کوونکي چې مخونه یې پټ وو، دوه تنه وو او دغه پولیس یې په تفنګچې وویشت.
تېره ورځ ناوخته د جلال اباد ښار په کمپونو سیمه کې هم یو کس چې هویت یې معلوم نه دی، په ډزو وژل شوی او عاملین یې تښتېدلي دي.
د دواړو پېښو مسولیت چا نه دی اخېستی.
وړمه ورځ د ملګرو ملتو امنیت شورا په افغانستان کې د هدفي بریدونو پر زیاتېدا اندېښنه وښوده.
د افغانستان حکومت وسله وال طالبان په دې بریدونو کې په لاس لرلو تورنوي، خو طالبان د دغو بریدونو مسوولیت په غاړه نه اخلي.
د ننګرهار والي وايي، د ملي امنیت د ریاست ځواکونو ۱۹ تنه د هدفي بریدونو او انتحاري حملو په تور نیولي دي.
ضیاالحق امرخېل په یوه خبري غونډه کې وویل چې په نیول شوېو کسانو کې د طالبانو د ښاري شبکې ۴ غړي هم شامل دي.
طالبانو تر اوسه پورې په دې اړه څه نه دي ویلي.