د امریکا دفاع وزیر په افغانستان کې د طالبانو د تاوتریخوالي د سمدستي کمېدو غوښتنه وکړه.
لوېډ اسټن په خپله لومړنۍ خبري ناسته کې جمعه (د کب ۱مه) وویل چې د افغانستان د سولې په پروسه کې پرمختګ او د امریکا د پوځي ښکېلتیا پای ته رسول د طالبانو د بریدونو په کموالي تړلې ده.
لوېډ اسټن وايي، په افغان سوله کې پرمختګ د طالبانو د بریدونو په کموالي تړلې ده
ښاغلي اسټن زیاته کړه: "تاوتریخوالی ډېر زیات دی او د افغانانو په مشرۍ خبرو کې ډېر پرمختګ ته اړتیا ده. ځکه هم زه ټولې خواوې دې ته هڅوم چې د سولې لار غوره کړی. تاوتریخوالی باید راکم شي."
امریکا باید له طالبانو سره د ۲۰۲۰ میلادي کال د فبروي تړون پر اساس د مې تر لومړۍ خپل ټول پوځیان له افغانستانه وباسي.
ښاغلي اسټن وویل، دې نېټې ته یې پام دی خو د امریکا اداره په افغانستان کې خپل راتلونکي ګامونه په سیسټماټیک او قصدي توګه ارزوي.