د امریکا په سنا کې د پخواني ولسمشر ډونالډټرمپ دوهمه استیضاحیه محاکمه وروستیو پړاوونو ته نږدې شوې او تمه ده، چې د تېرو ورځو د بحثونو په اړه وروستۍ نتیجه نن اعلان شي.
تمه ده چې په دې پسې احتمالاً د پخواني ولسمشر د محکومیت یا برائت لپاره رایې واخیستل شي.
د ټرمپ مدافع وکیلانو پرون خپله وروستۍ دفاعیه واوروله.
یوه مدافع وکیل بروس کاسټور وویل د ټرمپ د محکومولو لپاره کافي اسناد نه شته.
هغه زياتوي: "په هغو اسنادو کې چې د استازو جرګې د استیضاح د مادې لپاره وړاندې کړي دي، هېڅ شواهد نه شته. نو موږ دلته د څه لپاره راغلي یو؟ سیاست! د دوی هدف د یوه سیاسي حریف له منځه وړل دي."
ټرمپ تورن دی، چې په یوه وینا کې یې خپل پلویان د جنوري په شپږمه نېټه د کانګرس پر ودانۍ یرغل ته هڅولي دي.
پرون په سنا کې د پخواني ولسمشر د استیضاحیه محاکمې څلورمه ورځ وه.
د سنا غړي په دې محاکمه کې د قاضیانو په توګه عمل کوي.