د افغانستان د ملي امنیت سلاکار وايي، په افغانستان کې د لنډ مهاله حکومت جوړېدل، د پردیو د لاسوهنو د دایمي فُرصت معنی لري.
حمد الله محب نن شنبه(د سلواغې ۱۱مه) په ټوټیر کې لیکلي، که طالبانو ولسي بنسټ، دیني مشروعیت او کورنی تصمیم لرلای، د اوربند پر بنسټ به یې د سولې بین الافغاني مذاکرې جاري ساتله.
موقت حکومت د پردیو مداخلو لپاره د دایمي فرصت معنا لري. که طالبانو ولسي بنسټ، دیني مشروعیت او کورنی تصمیم لرلای، د سولې بین الافغاني مذاکره به یې د اوربند پر بنسټ جاري ساتله. ۲/۲
— Hamdullah Mohib (@hmohib) January 30, 2021
تر دې مخکې د طالبانو د سیاسي دفتر یوه مشر شېر محمدعباس ستانکزي ویلي چې ولسمشر محمد اشرف غني باید استعفا وکړي.
د جمهوري ریاست مرستیال ویاند دوا خان مینه پال
بل خوا د جمهوري ریاست مرستیال ویاند دوا خان مینه پال نن شنبه ازادي راډیو ته وویل: "افغانان د یوه اساسي قانون خاوندان دي چې په دې اساسي قانون کې د قدرت لېږد په ډېر واضح ډول تعریف شوی دی. افغانان د نظام انقطاع نه غواړي او د نظام انقطاع افغانانو ته په لوړه بیه تمام شوی دی."
تر دې مخکې هم حکومتي چارواکو په افغانستان کې د لنډمهاله حکومت د جوړېدو پر اوازو سخت عکس العمل ښوولی وو.