د روسیې د پلازمېنې مسکو په ګډون پرون د دغه هېواد لسګونه ښارونه د لویو مظاهرو شاهدان وو.
مظاهرهچیانو د کرملېن د سرسخته مخالف الکسي ناوالني د خوشې کېدو غوښتنه کوله.
دا مظاهرې په تېرو څو کلونو کې د پراخوالي له کبله په روسیه کې بېسارې بلل شوې دي.
د روسیې منتقد الکسي ناوالني یوه اوونۍ وړاندې جرمني کې له درملنې وروسته مسکو ته ستون شو چې هوایي ډګر کې د پولیسو لهخوا ونیول شو.
د (OVD-Info) سازمان په راپور کې چې د سیاسي توقیفونو موضوعات تعقیبوي راغلي، پولیسو پرون په ټوله روسیه کې شااوخوا څلور زره مظاهره کوونکي نیولي دي.
زرګونه مظاهره کوونکي د مسکو ښار په پوشکین میدان کې راټول شوي وو، دوی هغه مهال له پولیسو سره ونښتل او وډبول شول چې پولیسو یې د نیولو او موټرو ته د پورته کولو هڅه کوله.
روسیه کې د پولیسو او مظاهره کوونکو اخوډب
پولیس بالاخره وتوانېدل چې مظاهره کوونکي له دغه میدانه وباسي. له دې میدانه څو کیلو متره لیرې زرګونه نور مظاهرهچیان راټول شوي وو چې پولیسیې د واورو په توپونو ویشتل.
چارواکو ویلي، څلور زره کسانو پرونۍ مظاهرو کې ګډون درلود، خو روېټرز خبري اژانس د مظاهره کوونکو شمېر شااوخوا ۴۰ زره یاد کړی دی.
د پرونیو مظاهرو پر مهال د الکسي ناوالني مېرمن یولیا ناوالني او د ناوالني یو سکرتر لیوبول سوبل هم چې پوشکین میدان کې یې مظاهرهچیانو ته وینا کوله، نیول شوي دي.
په ټولنیزو رسنیو کې داسې صحنې هم خپرې شوي چې د پولیسو د تاوتریخجن چلند ادعا پهکې شوې ده.
په یوې صحنې کې لیدل کېږي چې پولیس د یوه مظاهره کوونکي پر غاړه خپل زنګون ورږدي. د بخښنې نړیوال سازمان د مظاهره کوونکو نیول غندلي دي.
د روسیې د اپوزېسیون مشر الکسي ناوالني
الکسي ناوالني چې تېره یکشنبه ونیول شو، د ۳۰ ورځو په مخه بندي شوی دی. هغه مهال ناوالني او نږدې کسانو یې خلک د روسیې د دې اقدام پر ضد مظاهرو ته راوبلل.
ناوالني د تېر اوړي په وروستیو کې سخت ناروغ او د درملنې لپاره جرمني ته ولېږدول شو. هلته معلومه شوه چې نوموړی په نوویچوک زهري ګازو مسموم شوی دی.