د امریکا په متحد ایالتونو کې د کووېډ- نولس ناروغۍ د قربانیانو شمېر د چهارشنبې په ورځ یوې نوې لوړې کچې ته ورسېد او روغتیایي چارواکو وویل چې د کرونا ویروس د واکسین د پيلېدو چارې په سمه روانې دي.
- امریکا
د جانز هاپکېنز پوهنتون د شمېرو له مخې چې چهارشنبې (د لېندۍ ۲۷مه) خپرې شوې، د امریکا په متحد ایالتونو کې د کرونا له امله د ۲۴ ساعتونو په ترڅ کې د قربانیانو شمېر ۳۷۰۰ ته ورسېد او د کرونا نوې مثبتې پېښې تر دوه لکه پنځوس زرو واوښتې.
د دې پېښو له پنځو یوه برخه په کالفورنیا کې دي چې روغتونونه د بیروبار له امله له ستونزو سره مخامخ شوي دي.
د امریکا په متحد ایالتونو کې د کرونا له امله د ۲۴ ساعتونو په ترڅ کې د قربانیانو شمېر ۳۷۰۰ ته ورسېد
دا اوومه ورځ ده چې په پرله پسې ډول د کرونا تلفات په متحد ایالتونو کې په زیاتېدو دي چې په اوسط ډول هره ورځ تر دوه نیم زره د ډېرو کسانو ژوند اخلي.
د بستر شوېو کسانو شمېره بیا ۱۹ ورځې وشوې چې په زیاتېدو دي او متخصصین خبرداری ورکوي چې د تلفاتو شمېرې به په راتلونکو اونیو کې لوړې وي. البته د واکسین ورکړه به هم په راتلونکو اونیو کې پسې زیات شي.
په یو شمېر نورو هېوادونو کې هم د کووېډ- نولس ناروغۍ پېښې په زیاتېدو دي.
- جنوبي کوریا
جنوبي کوریا خبر ورکړ چې نن پنجشنبه (د لېندۍ ۲۷مه) په کې د کرونا د قربانیانو د تلفاتو شمېره تر بل هر وخت لوړه شوې ده.
- جاپان
جاپان بیا نن وویل چې په پلازمېنه توکیو کې روغتیایي سیستم تر سخت فشار لاندې دی.
-
توکیو کې روغتیایي سیستم تر سخت فشار لاندې دی.
سویډن
سویډن بیا د کرونا وبا د دوهمې څپې له امله په تیره یوه اوونۍ کې تر ۵۰۰ د ډېرو تلفاتو خبر ورکوي.
- جرمني
جرمني پرون د نهه سوه دوه پنځوس نویو تلفاتو خبر ورکړ.
ټاکل شوې ده چې نن د جرمني صدراعظمه انګېلامېرکل د ویډیو کنفرانس له لارې د جرمني د بایونتیک کمپنۍ له مشرانو سره خبرې وکړي، دې کمپنۍ د امریکا له فایزر کمپنۍ سره په ګډه د کرونا واکسین جوړ کړی دی.
تمه ده چې جرمني سر له نوې اوونۍ دا واکسین په خپله خاوره کې پيل کړي.
د اروپا د دوا موسسې ویلي دي چې د فایزر-بایونتیک کمپنۍ د واکسین لپاره به د ډسمبر په ۲۱مه شین څراغ بل کړي، پخوا داسې ویل کېدل چې تر دې به اته ورځې وروسته اروپایي ټولنه پریکړه کوي چې دې واکسین ته اجازه ورکړي چې د اروپایي ټولنې په هېوادونو کې تطبیق شي.
د کرونا واکسین چې دوه ځله باید وشي په بریتانیا، د امریکا په متحد ایالتونو او کاناډا کې خلکو ته ورکول کیږي.
د نظر پوښتنو له مخې یو شمېر امریکایان د دې واکسین په اړه دوه زړي دي.
تمه ده چې راتلونکې اوونۍ د امریکا منتخب ولسمشر جوبایډن واکسین ترلاسه کړي، ده ویلي دي چې دی به علني د خلکو مخکې واکسین وکړي چې امریکایان دې واکسین ته وهڅول شي.
بایډن اته اویا کلن دی او کرونا ویروس د زړو لپاره ډېر خطرناکه دی.