نامعلومو وسله والو په شمالي وزیرستان کې څلور قبایلي مشران ووژل.
د سیمې اوسېدونکو او پولیسو ازادي راډیو ته وویل، پر قبایلي ملکیانو پرون هغه مهال له یوه بل موټر څخه ډزې وشوې چې هغوی د میرعلي د سیمې په خیسور ښارګي کې په موټر کې روان ول.
حمله کوونکي د پېښې له ځایه وتښتېدل.
تراوسه د دې برید مسوولیت چا په غاړه نه دی اخیستی.
په شمالي وزیرستان کې د پښتون ژغورنې غورځنګ یو فعال عیدالرحمان وايي، په سیمه کې یې دا ډول پېښې پر له پسې کېږي او خلک یې اندېښمن کړي دي.
