پاکستاني چارواکي وايي چې د احمدیانو مذهبي لږکیو یو غړی پرون جمعه (د لړم ۳۰مه) د یوه بریدګر په ډزو سره وژل شوی.
پېښه د پنجاب په سنګله هیل سیمه کې شوې ده.د پولیسو په خبره یوه ۱۶ کلن هلک د احمدي جماعت په غړي ډزې کړي.
بریدګر د پولیسو له خوا نیول شوی او ویلي یې دي ځکه یې په احمدیانو برید وکړ چې د ده په خبره اسلام ته یې سپکاوی کاوه.
وژل شوی کس ۳۱ کلن او ډاکټر و او نوم یې طاهر احمد یاد شوی.
د ۱۶ کلن بریدګر په ډزو سره د وژل شوي طاهر احمد د پلار په ګډون دری کسان ټپیان شوي دي.
د احمدي اقلیت ویاند سلیم الدین دا برید غندلی او ویلي يې دي چې احمدیان د خپلو عقیدو په خاطر تر برید لاندې راځي.
هغه زیاته کړې چې د عمران خان حکومت په سمه توګه له دوی دفاع نه ده کړې او په وروستیو څو کلونو کې پرې زیات بریدونه شوي.