د روسیې ولسمشر وايي، پر بېلاروس، قرغزستان او ماډووا بهرني فشارونه د منلو وړ نه دي.
د روسیې ولسمشر ولادیمير پوتین د سې شنبې په ورځ د شنګهای همکارۍ سازمان په ویډيويي غونډه کې وویل چې پر بېلاروس بهرني فشارونه زیات شوي دي او دا فشارونه د منلو وړ نه دي.
په بېلاروس کې وروسته له هغه پراخ لاریونونه پیل شول چې د اګست په نهمه د ولسمشريزو انتخاباتو په نتیجه کې الکساندر لوکاشینکا ګټونکی اعلان شو.
لاریون کوونکي له لوکاشینکا غواړي چې استعفا ورکړي.
د بېلاروس سیاسي مخالفان او لویديځ هیوادونه وايي، چې په دغو انتخاباتو کې پراخې درغلۍ شوې وې.
مسکو د لوکاشینکا ملاتړ کوي.
لوکاشینکا له درو میاشتو راهیسې د لاریونو د ځپلو هڅې روانې کړي دي.
د شنګهای همکارۍ سازمان په غونډه کې پوتین وویل: په بېلاروس کې تر ولسمشریزو انتخاباتو وروسته، زموږ بېلاروسي ملګري له بې ساري فشار سره مخامخ شوي دي، دوی د پارونو او بندیونو پر وړاندې درېدلي چې د معلوماتو او پروپاګند د جګړې له لارې پر دوی لګول شوي.
الکساندر لوکاشینکا
لوکاشینکا په علني توګه ویلي چې اروپايي ټولنه هیوادونه د ده په هیواد کې په لاریونو کې لاس لري.
پوتین په خپله وینا کې د پخواني شوروي اتحاد دوه نور غړي مالدووا او قرغزستان نهم یاد کړل چې تر بهرني فشار لاندي دي.
په قرغزستان کې د ولسمشریزو انتخاباتو د نتیجو پر وړاندي پراخ لاریونونه وشول چې په پایله کې يې حکومت منحل او د پارلمان رییس له دندې لیرې شو او په دې هېواد کې د پراخ سیاسي کړکېچ په نتيجه کې ولسمشر سورنبای جین بیکوف تېره میاشت له خپلې دندې استعفا ورکړه.
په مالدووا کې د اروپا ملاتړې ولسمشریزې کاندیدې مایا ساندو د نومبر په لومړۍ نېټه په حیرانوونکې توګه لومړی پړاو انتخابات وګټل او اوس د مسکو له ملاتړ لرونکي کاندید ایګور دودون سره په دوهم پړاو انتخاباتو کې برخه اخلي.
پوتین دا هم وویل چې د مسکو په منځګړیتوب د اذربایجان د جلاغوښتونکې سیمې نګورنوقره باغ اوربند به د ارمنستان او اذربایجان تر منځ سولې ته او په جنوبي قفقاز کې ثبات ته لاره هواره کړي.
پوتین زیاته کړه چې د شنګهای همکارۍ سازمان سرمشریزه به د کرونا ویروس د مخنیوي پر موضوع ګډه اعلامیه ورکړي.
د ایس سي او یو شمېر غړي هېوادونه چین، هند، قرغزستان، قزاقستان، پاکستان، روسیه، تاجکستان او ازبکستان دي.
افغانستانه، بېلاروس، ایران او منګولیا په دې اداره کې د څارونکي رول لري او ارمنستان، اذربایجان، کمبوډيا، نیپال، ترکیه او سري لنکا د دې ادارې مذاکراتي شریکان دي.