د افغانستان دفاع وزارت ادعا کوي، چې د هلمند د نادعلي او ناوې ولسوالیو پراخې سیمې یې له وسله والو طالبانو بېرته نیولي دي.
دغه وزارت وايي، په پوځي عملیاتو کې تر سلو زیاتو طالبانو ته مرګ ژوبله اوښتې ده.
د افغانستان دفاع وزارت تمه لري، چې په هلمند کې د پیل شویو عملیاتو په نتیجه کې به په لښکرګاه او شاوخوا ساحو کې وضعیت عادي بڼه خپله کړي.
د وزارت په حواله د پیل شویو عملیاتو په نتیجه کې د لښکرګاه تر څنګ په نادعلي او ناوې ولسوالیو کې زیاتې ساحې له وسله والو طالبانو بېرته نیول شوي دي.
فواد امان
د دفاع وزارت مرستیال ویاند فواد امان تېر ماښام ازادۍ راډیو ته وویل: "په وروستیو کې د هلمند د ناوې او نادعلي ولسوالیو زیاتې ساحې له وسله والو طالبانو تصفیه شوې، په دغو ساحو کې طالبان راغونډ شوي وو، خلک یې ځورول او له دوی یې باج اخیست، د دواړو لوریو په وسله والو نښتو کې تر سلو زیات طالبان مړه یا هم ټپیان شول، د دوی زیاتې وسلې د افغانستان د امنیتي او دفاعي ځواکونو لاس ته ورغلې، په هلمند، په ځانګړي ډول د لښکرګاه ښار په څنډو کې عملیات په شدت روان دي، که خدای کول په لښکرګاه کې به وضعیت عادي شي."
دفاع وزارت نه دي ویلي، چې د پوځي عملیاتو پر مهال څو تنه افغان پوځیانو ته مرګ ژوبله اوښتې ده.
بلخوا د هلمند والي وايي، د پوځي عملیاتو پرمهال یو موټربم او په لسګونو کړۍ ماینونه هم کشف او شنډ کړای شوي دي.
والي، ازادۍ راډیو ته وویل، تصفیه شويو سیمو ته د بېځایه شویو کورنیو ستنېدل پیل شوي دي.
تورن جنرال محمد یاسین
هغه زیاته کړه: "د خوشبختۍ ځای دا دی، د دغو سیمو خلک چې د جګړو له کبله بېځایه شوي وو، بېرته خپلو کورونو ته تللي او هلته ځای پر ځای کېږي."
د هلمند په ځینو سیمو له دې جملې مرکز لښکرګاه، ناوې او نادعلي کې د تلې/ میزان پر ۲۰مه جګړې پیل شوې، چې وسله والو طالبانو د لښکرګاه د ځینو برخو په ګډون ځینې سیمې ونیولې.
د هلمند چارواکو ویلي چې په دغو تازه جګړو کې نږدې لس زره کورنۍ نورو سیمو ته کډې کولو ته مجبوره شوي دي.