د افغانستان ولسمشر محمد اشرف غني د امریکا د ملي امنیت له سلاکار رابرټ اوبراین سره خبرې وکړې.
د ولسمشر ویاند صدیق صدیقي نن په یوه ټویټ کې ویلي چې ولسمشر له اوبراین سره د سولې د بهیر او د بندیانو د تبادلې پر مسلو خبرې وکړې او ټینګار یې وکړ چې اړتیا ده د طالبانو او حکومت ترمنځ مخامخ خبرې پیل شي.
President Ghani spokes with Mr. O%27Brian about the AFG Peace process, the exchange of prisoners, and Pres. Ghani stressed the need for the start of the direct negotiation between the Taliban and the government. Both emphasized the importance of a ceasefire for a durable peace ... https://t.co/udUwXotpX2 pic.twitter.com/HHRnses1Ze
— Sediq Sediqqi (@SediqSediqqi) September 1, 2020
دواړو لورو همداشان د تلپاتې سولې لپاره اوربند مهم بللی دی.
د امریکا د ملي امنیت شورا هم په یوه ټویټ کې له افغان ولسمشر سره د اوبراین ټیلیفوني خبرې ګټورې بللې او ویلي یې دي چې اوبراین له ځنډ پرته د افغانانو ترمنځ د خبرو د پیلېدو پر اړتیا ټینګار کړی.
د امریکا د ملي امنیت شورا د ټویټ له مخې امریکا یو ځل بیا د یوه خپلواکه، ډیموکراتیک او یو موټي افغانستان څخه چې بیا هېڅکله هم د نړیوال تروریزم د یوې سرچینې په توګه استعمال نشي، ملاتړ وکړ.
د ولسمشر ویاند دغه راز ویلي چې امریکا په افغانستان کې د تېرو ۱۹ کلونو د لاس ته راوړنو په دوام پر ټینګار سربېره دغه راز د افغان امنیتي ځواکونو هم کلک ملاتړ څرګند کړ.
د طالبانو او حکومت ترمنځ د سولې د مخامخ خبرو د پیلېدو پر وړاندې د طالبانو د یو شمېر مهمو بندیانو نه خوشې کېدل یو خنډ و چې له پرون راهیسې یې دغه بهیر پیل شوی دی.