د افغانستان جمهوري ریاست د لومړي مرستیال دفتر د اوربند په اړه د یوناما له غوښتنې د هرکلي ترڅنګ له طالبانو غواړي چې اورکم، بینالافغاني خبرو او تلپاتې سولې ته دې زمینه برابره کړي.
وروسته له هغې چې په افغانستان کې د ملګرو ملتونو سیاسي دفتر یا "یوناما" د راتلونکي لوی اختر په ورځو کې د جګړې له ښکېلو اړخونو د اوربند غوښتنه کړې، د افغانستان د جمهوري ریاست د لومړي مرستیال دفتر وايي، که طالبان اوربند نهکوي، لږترلږه دې تاوتریخوالی راکم کړي، څو په افغانستان کې د سراسري سولې لپاره د بینالافغاني خبرو زمینه برابره شي.
د دې دفتر د رسنیو او عامه اړیکو د دفتر رئیس رضوان مراد که څه هم د اختر په ورځو کې له احتمالي اوربند هرکلی کوي، خو وایي چې لنډ مهالی اوربند نهشي کولای د افغانانو درد ته دوا شي.
ښاغلی مراد د بینالافغاني خبرو په پيل ټینګار کوي، څو سراسري سولې ته زمینه برابره شي.
ښاغلی مراد زیاتوي: "که اوربند نهکېږي، تاوتریخوالی دې دومره کم شي، څو خلک ډاډه شي او د افغان جګړې د ختمېدو او سولې ته زمینه برابره شي، د حکومت او طالبانو ترمنځ مذاکرات پیل شي، تر هغې چې مذاکرات او اورکم محسوس نهشي، درې ورځې اوربند ممکن ښه کار وي، خو د افغانانو درد نهشي دوا کولای."
په افغانستان کې د ملګرو ملتونو سیاسي دفتر (یوناما) له افغان حکومت او طالبانو غوښتي چې د اختر په ورځو کې جګړه بنده کړي.
د یوناما مشرې دیبرا لاینز د جګړې په ښکېلو خواو غږ کړی چې جنګ بس کړي او بینالافغاني مذاکراتو ته لاره هواره کړي.
یوناما تېره ورځ په خپل ټویټر د اغلې لاینز له قوله لیکلي، د جګړې اړخونه دې د اختر په ورځو کې اوربند وکړي او همدا شان دې له اوربند وروسته بینالافغاني خبرې پیل کړي.
که څه هم طالبانو تر اوسه نهدي ویلي چې د اختر په ورځو کې اوربند کوي کنه، خو د دغې ډلې ویاند ذبیحالله مجاهد ازادي راډیو ته وویل، ښايي له اختر وروسته به بینالافغاني خبرې پيل شي.
په ورته وخت کې د طالبانو د واکمنۍ پر مهال د امر باالمعروف مسؤل مولوي قلمالدین ازادي راډیو ته وویل چې احتمال شته چې طالبان د اختر په ورځو کې اوربند وکړي.
ښاغلی قلمالدین زیاتوي: "تمې شته چې اوربند وشي، کره معلومات نهلرم چې طالبانو پرېکړه کړې کنه، خو زه خوشبینه یم چې د اختر په ورځو کې به اوربند وشي."
دا په داسې حال کې ده چې تازه په قطر کې د طالبانو د سیاسي دفتر ویاند سهیل شاهین ویلي چمتو دي چې په مشروط ډول تر اختره د افغان حکومت پاتې بندیان هم ازاد کړي.
ښاغلي شاهین پر خپل ټويټر لیکلي دي چې دا چاره هغه وخت ممکنه ده چې افغان حکومت د طالبانو د ورسپارل شوي لېست مطابق طالب زندانیان ازاد کړي.
امارت اسلامی آماده است که تا روز عید اضحی آینده زندانیان باقی مانده جانب مقابل را به این شرط رها نماید که زندانیان متباقی ما هم مطابق لست سپرده شده رها شوند.بعد ازتکمیل پروسه رهایی زندانیان، امارت اسلامی اماده گی دارد که بعد از آیام عید مذاکرات بین الافغانی را متصلا آغاز نماید.
— Suhail Shaheen (@suhailshaheen1) July 23, 2020
ښاغلي شاهین هم ویلي چې دغه ډله له اختر وروسته بینالافغاني خبرو ته چمتووالی لري.
په همدې حال کې د افغانستان د ملي امنیت شورا په قطر کې د طالبانو له سیاسي دفتر غوښتنه کړې چې جګړې ته د خوشې شویو طالب زندانیانو د بیا ورتګ مخه باید ونیسي.
د دې شورا ویاند جاوېد فیصل پر خپله ټویټر پاڼه لیکلي چې طالب بندیانو د خوشې کېدو پر مهال قسم یاد کړی و چې بیا به په جګړه کې برخه نهاخلي، په داسې حال کې چې ډېر جنګیالي یې یو ځل بیا د افغانستان د خلکو پر ضد جنګېږي.
طالب زندانیانو د ازادېدو پر وخت سوګند یاد کړی، چي جګړې ته به نه راګرځي، خو یو تعداد یې بیا اوس د افغانستان د خلکو خلاف جګړه کوي. د طالبانو د قطر دفتر باید له ژمني سره سم، جنګ ته د بیرته ستنېدونکو ازادو سوو زندانیانو مخه ونیسي، تاوتریخوالی ودروي او مخامخ خبري ژر تر ژره پیل کړي.
— Javid Faisal (@Javidfaisal) July 23, 2020
دا په داسې حال کې ده چې په دې وروستیو کې په افغانستان کې د جګړو له امله تاوتریخوالی زیات شوی چې ورسره د ملکیانو د مرګژوبلې کچه هم لوړه شوې ده.