پاکستان وايي، د یوه امریکايي شرکت څخه یې پر کوویډ-۱۹ د اغېزناکو درملو جواز تر لاسه کړی دی.
د پاکستان د صدراعظم عمران خان سلاکار ظفر مېرزا نن په اسلام اباد کې په یوه خبري کنفرانس کې وویل، د دې درملو د جوړولو کار تر راتلونکو شپږو څخه تر اتو میاشتو پورې پیلېږي.
میرزا وویل: "ډېر خوشاله یم چې په امریکا کې د ګیلیاد شرکت جواز مو چې دې ته داوطلبانه جواز وايو، په ټوله نړۍ کې پنځو شرکتونو ته ورکړل شوی دی. د دې جواز له مخې به د رمیډي سېویر په نوم درمل په پاکستان کې هم جوړ شي،رمیډي سېویر هغه درمل دي چې په امریکا او جاپان کې د بستر شویو ناروغانو لپاره ورڅخه استفاده شوې."
اوسمهال دا درمل په نړۍ کې د کوویډ-۱۹ یوازینۍ درملنه ګڼل کېږي.