د ننګرهار په محبس کې د کرونا ویروس د مثبتو مواردو له موندل کېدو وروسته والي شاه محمودمیاخېل د عامې روغتیا او محبس مسوولانو ته په دې برخه کې لازمې سپارښتنې کړې دي.
د ننګرهار ولایت د رسنیو څانګه په یوه بیان کې وايي، د دې ولایت په محبس کې له ۷ مشکوکو پېښو څخه ۶ یې مثبتې ووتې.
په بیان کې راغلي دي چې ښاغلی میاخیل د روغتیا د ریاست او محبس له مسوولو چارواکو سره په کتنه کې وویل چې ناروغو بندیانو ته په محبس کې جلا تجرید خونې پرانیستل شوي.
بیان زیاتوي چې د ناروغو بندیانو وضعیت د ډاډ وړ دی.
په بیان کې دا یادونه هم شوې ده چې په کوویډ-۱۹ ناروغۍ مشکوک ۱۲ نور کسان هم په جلا ځای کې تر مراقبت لاندې دي.
دا په داسې حال کې ده چې نن د ننګرهار د کرونا په لابراتوار کې د ختیځ په کچه د ۲۷ نورې مثبتې پېښې تایید شوې او له دې سره د هېواد په ختیځ کې د کوویډ-۱۹ د ناروغانو شمېر ۳۰۵ ته لوړ شو.
د ننګرهار ولایت د رسنیو څانګه وايي چې له دې پېښو څخه اته په ننګرهار، دولس په لغمان او اوه په کونړ کې ثبت شوې دي.