د افغانستان د ملي امنیت شورا وايي پرونیې ۱۰۲ تنه طالبان له زندانونو خوشې کړي دي.
دا خبره د ملي امنیت شورا ویاند جاوېد فیصل نن په خپله ټویټرپاڼه لیکلې.
هغه ویلي چې څه باندې ۸۵۰ طالب بندیان تر اوسه د افغانستان له زندانونو خوشې شوي او د خبرو تر پیل مخکې نور هم خوشې کېږي.
Pursuant to Pres. @ashrafghani decree, the gov%27t released 102 Taliban yesterday. Over 850 has been released, getting us more than halfway to 1,500. More can be released upon the start of talks. Taliban should resume release of ANDSF personnel off the list the gov%27t has shared. pic.twitter.com/skA7A1awGC
— Javid Faisal (@Javidfaisal) May 5, 2020
د امریکا او طالبانو د توافق په اساس چې د فبرورۍ په ۲۹مه په دوحه کې لاسلیک شو افغان حکومت د طالبانو پنځه زره بندیان خوشې کوي او په بدل کې یې طالبان زر تنه بندیان راخوشې کوي.
افغان حکومت بیا ویلي چې بندیان خوشې کوي، خو په تدریجي شکل او د خبرو تر پیل مخکې یو نیم زر تنه راخوشې کوي.
طالبانو هم د بندیانو د راخوشې کېدو د پروسې هرکلی کړی، خو ټینګار یې کړی چې نور بندیان دې هم خوشې شي څو د بینالافغاني خبرو پيل ته زمینه برابره کړي.
د افغانستان حکومت ټینګار کوي چې طالبان دې هم د ژمنو سره سم د افغان حکومت د لېست مطابق د امنیتي او دفاعي ځواکونو نیول شوي غړي خوشې کړي.