په قطر کې د طالبانو سیاسي دفتر د بندیانو د خوشې کېدو د پروسې د لا ګړندۍ کېدو غوښتنه وکړه.
د دغه دفتر ویاند سهیل شاهین تېره شپه په ټویټر کې لیکلي چې په تېرو ۳ ورځو کې د طالبانو تر ۳۰۰ پورې بندیان خوشې شوي چې دوی یې هرکلی کوي.
سهیل شاهین وايي دا جریان کافي نهدی باید د کرونا له ویروس څخه د ژغورل کېدو لپاره دا پروسه چټکه او راتلونکو بینالافغاني مذاکرو ته "ژر" لار اواره شي.
د افغانستان د ملي امنیت شورا پرون وویل چې تېره شنبه او یکشنبه د طالبانو ۱۹۶ بندیان خوشې شوي چې ورسره د خوشې شویو طالب بندیانو شمېر نږدې ۷۵۰ ته ورسېد.
خو د دې شورا ویاند جاوېد فیصل پرون ازادي راډیو ته وويل، د بندیانو له خوشې کېدو سره سره طالبان لا هم سولې ته ژمن نهدي.
په قطر کې د طالبانو د سیاسي دفتر ویاند سهیل شاهین ویلي، دوی به هم د بندیانو خلاصولو ته دوام ورکوي.
راپورونه وايي د طالبانو لهخوا د خوشې شویو بندیانو شمېر ۱۱۴ ته رسېږي.
په پام کې ده حکومت د طالبانو ۵۰۰۰ بندیان او طالبان د حکومت ۱۰۰۰ تنه بندیان خوشې کړي.