د ملګرو ملتونو سرمنشي په افغانستان کې پر اوربند ټینګار وکړ.
انټونیو ګوټیرش پرون وویل چې ملګرو ملتونو ډيرې هڅې پيل کړې دي چې د افغان حکومت او طالبانو ترمنځ اوربند وشي.
د ملګرو ملتو سرمنشي په نړۍ کې د کرونا ویروس د خپرېدو له امله مخکې د مارچ په درویشتمه ۲۳ نېټه هم په ټوله نړۍ کې د افغانستان په ګډون چې جګړې پکې روانې دي د ښکېلو ډلو ټپلو ترمنځ د اوربند غوښتنه کړې وه.
ښاغلي ګوتیرش پرون وویل چې تر دې دمه په نړۍ کې ۱۶ وسله والو ډلو د ده غوښتنه منلې ده او اوربند ته یې غاړه ایښې ده.
د افغانستان ولسمشر اشرف غني هم د روژې مبارکې د راسېدو په پيغام کې له طالبانو د اوربند غوښتنه کړې وه خو طالبانو وویل چې دا غوښتنه د اوس لپاره معقوله نه ده.