ایران وايي ترڅو میاشتنیو ناکامو هڅو وروسته یې د ځمکې مدار ته یو نظامي سټلایت وتوغاوه.
دولتي ټلویزیون او تسنیم خبري اژانس چې د ایران په سپاه پاسداران انقلاب پوری تړلی ګڼل کېږي، نن په خپلو راپورونو کې دا یوه بریا بللې ده.
سم د لاسه د دغه سټلایټ د توغولو خبر په خپلواک ډول نه دی تایید شوی.
شنونکو په دې اړه اندېښنې ښوولي چې دغه کارول شوې ټکنالوژي ښايي له ایران سره د قاره ویشتونکو بالیستیک میزاییلو په جوړولو کې مرسته وکړي.
سپاه پاسداران انقلاب په خپل رسمي ویبسایټ کې ویلي دغه سټلایټ د ځمکې له سطحې ۴۲۵ کیلومتره لوړ مدار ته رسېدلی دی.
ایران په وروستیو کې د سټلایټ د توغولو څو ناکامې هڅې کړې دي.
د امریکا د بهرنیو چارو او دفاع وزارتونو مخکې ویلي وو، د توغندیو دغه ډول توغول به د ایران د بالیستیک میزاییلو پروګرام پرمختللی کړي.