د افغانستان د سوداګرۍ او پانګونې خونې چارواکي وايي، د پاکستان له لوري د سپین بولدک، چمن او تورخم بندرونو له پرانېستې وروسته تر اوسه ۲۰۰ کانټینره مالونه افغانستان ته انتقال شوي دي.
د دې خونې د عامه اړېکو مرستیال جان اقا نوید نن ازادي راډيو ته وویل، چې د دې بندرونو ترڅنګ نور بندرونه هم د افغان سوداګرو پرمخ پرانېستل شوې دي.
نوموړي وویل، چې د دوې هڅه داده څو د افغانستان صادرات هم پیل شي.
د افغانستان د سوداګرۍ خونې چارواکي وايي،د یادو موادو په انتقالېدو سره به د بیو په کچه کې هم ټيټوالی راشي.
په همدې حال کې د غزني د سوداګرۍ او پانګونې خونې رئیس عبدالمتین قلندري نن ازادي راډيو ته وویل، چې تیره ورځ د چمن او تورخم له لارې د افغان سوداګرو ۷۳ کانټینره مواد انتقال شوي دي.
نوموړي وویل،چې د توکو ډېره برخه خوراکې توکي دي چې په بازارونو کې به د قیمتونو په بیو کې د پام وړ بدلون راشي.