د افغانستان د کرنې او مالدارۍ وزارت وایي، د نیالګیو ایښودلو د کمپاین له پیل راهیسې تر اوسه د میوو ۴۰ زره باغونه جوړ شوي دي.
دغه وزارت ویاند اکبر رستمي نن ازادي راډیو ته وویل،چې دغه باغونه په ګرمو سیمو کې جوړ شوي چې د بېلابېلو میوو نیالګي په کې شامل دي.
نوموړي وویل، چې په سړو سیمو کې د باغونو جوړول روان دي او په روان کال کې به نږدې ۱۰۰ زره باغونه جوړ شي.
د نیالګیو ایښودلو کمپاین یوه میاشت وړاندې د هېواد په بېلابېلو سیمو کې پیل شو.
د کرنې او مالدارۍ وزارت وایي، د میوه لرونکو نویو باغونو په جوړېدو سره به بهر ته د میوو صادرات زیات او بڼوالو سره له اقتصادي پلوه مرسته وشي.