ایران نن اعلان وکړ چې ۱۵۷ نور کسان د کرونا ویروس له امله مړه شوي چې په دې سره په هېواد کې د دغه ویروس له امله د مړو شویو شمېر ۲۲۳۴ کسانو ته ورسېد.
ایران د دغه نویو مړینو خبر داسې مهال ورکوي چې د کرونا ویروس د خپرېدو د نوې څپې د مخنیوي لپارهیې نوي اقدامات کړي دي او د ښارونو ترمنځ پر سفر کولو سر له ننه بندیز لګول شوی دی.
له کرونا ویروس سره د مبارزې لپاره د ایران د ملي مرکز غړي حسین زوالفقاري نن وویل، هغوی چې د نوي کال په رخصتیو کې په سفر تللي باید سمدستی خپلو ښارونو ته راوګرځي او خپلو کورونو ته په لاره باید په هېڅ یوه ښار کې تم نهشي.
زوالفقاري وویل چې د پوهنتونونو او ښوونځیو بندېدل او همدا شان پر ځنډول شویو غونډو بندیز به دوام لري. هغه زیاته کړه چې د دغو اقداماتو له سرغړوونکو سره به قانوني چلند کېږي.
ایران پرون په دې هېواد کې د کرونا ویروس یا (کووایډ-۱۹) له امله د ۲۰۷۷ کسانو د مړه کېدو خبر ورکړ.
د ایران د روغتیا وزرات ویاند کیانوش جهانپور وویل چې همکارانو یې په تېرو ۲۴ ساعتونو کې د (کووایډ-۱۹) ۲۲۰۶ نوې مثبتې ثبت کړې چې په دې سره په دې ویروس د اخته شویو کسانو شمېر ۲۷۰۱۷ کسانو ته ورسېد.
ایران په جنوا کې دېره د بېسرحده روغتیایي ټولنې «اېم اس اېف» هغه وړاندیز چې غوښتلیې په اصفهان کې ۵۱ بستریزه روغتون جوړ کړي، رد کړی دی.
تهران همدا شان د واشنګټن د بشري مرستو وړاندیز هم رد کړی او ویلي یې دي چې که غواړي له تهران سره د دغې وبا په وړاندې مبارزه کې مرسته وکړي، نو لګول شوي بندیزونه دې لیرې کړي.