د امریکا متحده ایالاتو د بهرنیو چارو وزیر مایک پومپیو د میدان وردګو پر ښاروالې ظریفه غفاري وروستی برید په کلکه غندلی او هغه یې "بزدلانه" بللی دی.
مېرمن غفاري څو اونۍ وړاندې د متحده ایالاتو د بهرنیو چارو وزارت د زړورو ښځو جایزه ترلاسه کړه.
پومپیو د سه شنبې په ورځ په خپله ټویټر پاڼه لیکلي د افغانستان راتلونکی د هغو کسانو په لاس کې دی چې سوله او سیاسي حل لار غواړي نه د هغو کسانو په لاس چې د افغان میرمنو ګواښولو لپاره له تاوتریخوالي او ډارونې کار اخلي.
ناڅرګندو وسله والو د مارچ په ۲۲ په کابل کې د مېرمن غفاري پر موټر حمله وکړه خو هغې ته زیان ونه رسېده.
غفاري مخکې له دې چې وړم کال د میدان وردګو ښارواله شي د ښځو لپاره یې د یوې راډیو چارې مخته وړلې.
په لومړي سر کې ځینو خلکو د ظریفه غفاري مخالفت کاوه او اجازه یې نه ورکوله چې هغه د ښاروالې په توګه دنده ترسره کړي.