د میدان ښار ښارواله ظریفه غفاري نن ماسپښین د وسلهوالو د یوې ډلې له حملې روغه پاتې شوه.
د کابل د امنیه قوماندانۍ ویاند فردوس فرامرز ازادي راډیو ته وویل چې موټرسایکل سپرو کسانو د کابل په سپین کلي کې پر مېرمن غفاري حمله کړې ده.
د فرامرز په خبره، په پېښه کې مېرمن غفاري او ورسره کسانو ته کوم زیان نهدی اوښتی او امنیتي ځواکونه هڅه کوي د پېښې عاملان ونیسي.
مېرمن غفاري او ۱۱ نورو ښځو ته د روانې میلادي میاشتې په لومړیو کې د امریکا د بهرنیو چارو وزارت لهخوا د زړورو ښځو جایزه ورکړل شوه.
د امریکا د بهرنیو چارو وزارت وايي له ۲۰۰۷ کال راهیسې هر کال د نړۍ د بېلابېلو هېوادونو هغو ښځو ته دا جایزې ورکوي چې د ورپېښو ګواښونو سره سره کار کوي او قربانۍ ورکوي.