په کندهار او زابل ولایتونو کې په کرونا ویرس د دریو کسانو د اخته کېدو راپور ورکړل شو.
له دې سره په ټول افغانستان کې د کرونا ویروس د مثبتو پېښو شمېر ۳۴ ته ورسېد.
په دې ویروس د دوو کسانو د اخته کېدو راپور په زابل کې ورکړل شوی دی.
د زابل والي رحمت اله یارمل نن یکشنبه ازادۍ راډیو ته وویل، دا دوه کسان په وروستیو کې له ایرانه راستانه شوي وو.
هغه زیاته کړه: "دوی تقریباً څلور ورځې له موږ سره په هغه وارډ کې بستر وو، چې د کرونا ویروس د مخنیوي لپاره مشخص شوی دی، دوی مشکوک کسان وو، چې سمپلونه یې مرکز ته لېږل شوي وو، متاسفانه چې مثبت ختلي دي."
په کندهار کې هم په کرونا ویروس د یوه روغتيايي کارکوونکي د اخته کېدو خبر تایید شو.
د کندهار د والي ویاند احمد بهیر احمدي ازادۍ راډیو ته ویلي، دغه روغتيايي کارکوونکي په وروستیو کې د ایران مشهد ښار ته سفر کړی و.