په هرات ولایت کې په (کووایډ-۱۹) یا کرونا وایروس اخته لومړنی کس پرون له روغتون څخه رخصت شو.
د هرات د حوزوي روغتون چارواکي وايي، دا کس اوس په خپل کور کې تر روغتیايي څار لاندې دی.
د دې روغتون د انتاني څانګې مشر سید ابراهیم بسیم پرون پنجشنبه ازادي راډیو ته وویل، نوموړي کس ته ویل شوي چې څو ورځې وروسته دې یو ځل بیا د معاینې لپاره روغتون ته مراجعه وکړي.
ډاکتر بسیم زیاتوي چې په کرونا وایروس د اخته نورو څلورو کسانو روغتیايي وضعیت هم ښه شوی دی.
د هرات د روغتیا مسؤل چارواکي وايي په کرونا وایروس د مشکوکو اخته کسانو د څارنې لپاره تر پخوا زیات امکانات لري.