د امریکا ولسمشر ډونالد ټرمپ خپل افغان سیال محمد اشرف غني ته ټيلیفون کړی او د سولې د پروسې په وروستیو تحولاتو یې خبرې ورسره کړي.
دا خبره افغان جمهور رئیس یکشنبه ماښام په خپله ټویټر پاڼه لیکلې ده.
ښاغلي غني لیکلي ولسمشر ټرمپ د پروسې د مخته وړلو په هدف د افغان حکومت په رهبرۍ او دولتي ظرفیت باندې ډاډ څرګند کړ.
دوی دواړو داسې وخت خبرې کړي چې شنبه امریکا او طالبانو د قطر په پلازمېنه دوحه کې تړون لاسلیک کړ.
د دغه تړون له مخې چې افغان او امریکايي چارواکو مشروط بللی ټول بهرني پوځیان په ۱۴ میاشتو کې له افغانستانه وځي او د مارچ په ۱۰مه بینالافغاني مذاکرات پیلېږي.