چین کې د کرونا په ویروس د مړو شمېر تر ۳۰۰ تنه واوښت.
دا په داسې حال کې ده چې ګڼو هېوادونو د لومړنیو قضیو راپور ورکړی او د دې ویروس د مخنیوي لپاره یې چین ته پر سفر بندیزونه لګولي دي.
د چین روغتیايي چارواکو نن سهار وویل، لږ تر لږه ۳۰۴ کسان په دې هېواد کې کرونا ویروس وژلي دي.
دوی دغه راز وویل چې په دې ناروغۍ چې لومړی د هوبي ولایت په ووهان ښار کې خپرو شو، ۱۴ زره ۳۸۰ تنه اخته شوي دي.
له بلې خوا فلیپین نن وویل چې یو تن په دغه هېواد کې د کرونا په ویروس مړ شوی دی.
دا له چین څخه بهر په دې ویروس د یوه انسان د مړینې لومړنۍ پېښه ده.
روسیه، بریټانیا او سویډن هم د هغو هېوادونو په نوملړ کې شامل شول چې د کرونا ویروس قضیې یې تازه ثبت کړي دي.