د هغې اوکراینۍ الوتکې د قربانیانو په درناوي نن په دغه هېواد کې د ملي ماتم ورځ ولمانځل شوه چې تېره ورځ د ایران په پلازمېنه تهران کې راولوېده او ټولې ۱۷۶ سپرلۍ یې ووژل شوې.
د اوکراین هوايي شرکت ۷۳۷ ډوله بوینګ الوتکه کې د ۱۱ اوکراینیانو ترڅنګ د ایران، افغانستان، کاناډا، بریتانیا، سوېډن او جرمني اتباع سپاره وو.
الوتکه د تهران د امام خمیني له هوايي ډګر څخه اوکراین ته روانه وه چې له پورته کېدو لږ وروسته نسکوره شوه.
د اوکراین ولسمشر ولادیمیر زېلینسکي خپل ملت ته په وینا کې وویل چې دولت يې د هغو کسانو د کورنیو مرستې ته چمتو دی چې په دې پېښه کې یې غړي ووژل شول.
تراوسه د الوتکې د رالوېدو علت نه دی په ډاګه شوی، که څه هم په ایران کې د اوکراین سفارت ویلي و چې د الوتکې انجن له کاره لوېدلی و، خو وروسته یې خپله اعلامیه بېرته واخیسته.
د پېښې علت به د الوتکې د تور بکس چې د پرواز مهال ټول معلومات او د پیلوټانو غږ پکې ثبتېږي، تر ارزولو وروسته څرګند شي.