د امریکا متحده ایالتونو ولسمشر ډونالډ ټرمپ د پاکستان د پوځ د روزنې د پروګرام د بیا پيلېدو اجازه ورکړه.
دا خبره د جَنوبي او مرکزي اسیا په چارو کې د امریکا د بهرنیو چارو وزارت د مرستیالۍ دفتر په ټوېټر باندې لیکلې ده.
To strengthen mil2mil cooperation on shared priorities & advance US national security, @POTUS authorized the resumption of International Military Education and Training #IMET for Pakistan. The overall security assistance suspension for Pakistan remains in effect. AGW
— State_SCA (@State_SCA) January 3, 2020
په ټوېټ کې راغلي چې د امریکا ولسمشر د ګډو لومړیتوبونو او د امریکا د ملي امنیت د پرمختګ لپاره د پوځونو تر منځ د همکارۍ د غښتلي کولو په هدف د پاکستان د پوځ د تعلیم او تربیې د پروګرام د پیل اجازه ورکړې.
د بهرنیو چارو وزارت د سرپرست مرستیالې الیس ویلز په حواله دا ټینګار هم شوی چې له پاکستان سره د امریکا امنیتي مرستې به لا هم ځنډیدلې پاتې وي.
د امریکا ولسمشر ډونالډ ټرمپ د ۲۰۱۸ میلادي کال په لومړیو کې پر پاکستان نږدې یو نیم میلیارد ډالره امنیتي مرستې وځنډولې.
ټرمپ ویلي و چې پاکستان ۱۵ کاله امریکا تېر ایستلې او ۳۳ میلیارده ډالره یې له ترهګرۍ سره د مبارزې په نوم ترې اخیستي خو په عمل کې یې ترهګري نه ده ځپلې.
پاکستان د امریکا د مرستو د بندېدو په خاطر له امریکا ګیله ښکاره کړې وه.