د ایران مذهبي مشر ايت الله علي خامنه يي د ایران د قدس ځواک د قومندان قاسم سلیماني له وژونکو د "سخت غچ" د اخیستو خبردارى ورکړ.
سلیماني نن سهار د بغداد هوايي ډګر ته نژدې د امریکا په یوه هوايي برید کې ووژل شو.
خامنه يي همدارنګه د سلیماني پر مرګ درې ورځنى ملي ماتم هم اعلان کړی دی.
د ایران د قدس ځواک پر دې ځواکمن قومندان نن سهار هغه مهال هوايي برید وشو چې د بغداد نړیوال هوايي ډګر ته نژدې د دوو موټرو په یو کاروان کې روان و.
د امریکا پوځ وايي، دوی دفاعي برید کړی څو په سیمه کې د سلیماني له خوا د امریکا پر ګټو د نورو بریدونو د طراحۍ مخه ونیسي.
د ایران رهبر خامنه يي ویلي، دا اقدام به د امریکا په وړاندې د ایران د خلکو د مقاومت انګیزه دوه چنده کړي.
د ایران ولسمشر حسن روحاني په ټلویزوني څرګندونو کې وویل، دا وژنه به تهران د امریکا په وړاندې مقاومت کې نور هم قاطع کړي.
د ایران رسنیو ویلي چې ددې هیواد د بهرنیو چارو وزارت د سویس شارژدافیر احضار کړی او هغه ته یې د امریکا پر وروستي اقدام شدید اعتراض اورولی دی.
د واشنګټن او تهران ترمنځ د رسمي ډیپلوماتیکو اړیکو د نشتوالي له کبله سویس ایران کې د امریکا د ګټو استازولي کوي.