د افغانستان ولسمشر حکم کړی چې د پستې، زعفران او جلغوزو له قاچاق کوونکو سره قانوني چلند وشي.
محمد اشرف غني پرون (میزان ۲۴مه) حکم کړی چې د دغو درېیو موادو د قاچاق په تور نیول شوي کسان عدلي او قضایي ادارو ته معرفي شي.
د ولسمشر د پروني حکم جزئیات د ارګ په خبرپاڼه کې خپاره شوي دي.
د افغانستان د ملي دفاع او کورنیو چارو وزارتونو ته دنده سپارل شوې چې د وچې او هوا له لارې د جلغوزو، پستې او زعفران د قاچاق د مخنیوي پلان جوړ کړي.
افغانستان تېره میاشت د حیرتان بندر له لارې چین ته صادرات پېل کړل.
هند او ترکیې ته هم د چابهار بندر او هوايي دهلېز له لاري د افغانستان د تازه او وچو مېوو او ګران بيه ډبرو صادرات روان دي.