د افغانستان د سولې لپاره د امریکا ځانګړي استازي زلمي خلیلزاد هغه راپورونه رد کړل چې ګوندې له طالبانو سره د امریکا تر هوکړې وروسته به امریکا د افغان ځواکونو ملاتړ پای ته رسوي.
تر دې مخکې روېټرز خبري اژانس په یو راپور کې د دوو طالب قوماندانانو له خولې چې نومونهیې نهوو اخیستل شوي ویلي وو، د طالبانو او امریکايي پلاوي ترمنځ د احتمالي هوکړې له مخې به امریکا د افغان حکومت ملاتړ پای ته رسوي.
په دې راپور کې د طالب قوماندانانو له قوله زیاته شوې وه چې له امریکا سره د طالبانو تر هوکړې وروسته به امریکايي ځواکونه پر طالبانو بریدونه نهکوي، خو وسلهوال طالبان به د افغان ځواکونو خلاف جګړه روانه ساتي.
خو زلمي خلیلزاد نن پر خپل ټویټر ولیکل "د روېټرز خبري اژانس هغه راپور رښتیا نهدی چې د دوو بېنومه طالب قوماندانانو له خولې یې ویلي، د هر ډول هوکړې د یوې برخې په توګه به (امریکا) د افغان ځواکونو ملاتړ پای ته رسوي."
د رویترز یو راپور د دوو ناپیژندل شوو طالب قومندانانو په حواله ادعا کړې چې موږ به د توافق د یوې برخې په توګه د افغان ځواکونو ملاتړ ودروو. رښتیا نده!
— U.S. Special Representative Zalmay Khalilzad (@US4AfghanPeace) August 26, 2019
خلیلزاد دا خبرې تبلیغات بللي او زیاته کړې یې ده "موږ به اوس او له طالبانو سره له هر ډول توافق وروسته د افغان ځواکونو دفاع وکړو." د زلمي خلیلزاد په وینا د افغانستان راتلونکی به ټول لوري د بینالافغاني خبرو له لارې ټاکي.
هیڅوک باید په تبلیغاتو ونه ګواښل شي یا احمق شي! اجازه راکړئ چې په څرګنده یې ولیکم: موږ اوس دافغان ځواکونو دفاع کوو او په راتلونکي کې، له طالبانو سره د یو ډول توافق وروسته، به یې هم وکړو. ټولې غاړې موافقه دي چې د افغانستان راتلونکی به په بین الافغاني مذاکراتو کې وټاکل شي.
— U.S. Special Representative Zalmay Khalilzad (@US4AfghanPeace) August 26, 2019
د افغان ځواکونو په وړاندې د جګړې د دوام په اړه د ځینو طالب قوماندانانو وروستۍ څرګندونې او د زلمي خلیلزاد عکسالعمل په داسې حال کې رامخې ته کېږي چې په قطر کې د طالبانو سیاسي دفتر وایي، هڅه کېږي چې له امریکا سره د سولې هوکړهلیک په همدې پړاو کې وروستی شي.