امریکايي رسنیو راپور ورکړی چې د دې هېواد استخباراتي ادارو د القاعده شبکې د پخواني مشر اسامه بن لادن د زوی حمزه بن لادن د مرګ په اړه یې معلومات ترلاسه کړي.
د این بي سي ټلویزوني شبکې د درېیو امریکايي چارواکو له قوله چې نومونه یې نه دي یاد شوي، د حمزه بن لادن د مړینې خبر تأیید کړی دی.
خو د نوموړې د مړینې سبب او ځای تر اوسه څرګند نه دي.
سره له دې چې خبریالانو په دې اړه پرون د امریکا له ولسمشر ډونالد ټرمپ پوښتنه وکړه، خو هغه وویل چې په دې هکله تبصره نه کوي.
د امریکا متحده ایالاتونو د روان کال د فبرورۍ په میاشت کې حمزه بن لادن په اړه د دقیقو معلوماتو ورکولو په بدل کې یو میليون ډالر جایزه اعلان کړې وه او ویلې یې وو چې د اسامه بن لادن زوی حمزه بن لادن د القاعده شبکې په یو رهبر د بدلېدو په حال کې دی.