پهداسې حال کې چې د پاکستان صدراعظم او د امریکا جمهور رئیس سبا د جولای په ۲۲مه په سپینه ماڼۍ کې سره ګوري او د خبرو اساسي مسئله به یې د افغانستان وضعیت وي، د امریکا خاص استازی د یوه نوی ماموریت د پيل خبره کوي.
زلمي خلیلزاد په یوه ټویټ کې لیکلي: زه د نور پرمختګ په هیله، بیا یوه بل ماموریت ته تیارېږم.
هغه نور جزئیات یې نهدي ورکړي.
In addition to briefing management while in DC, I had the opportunity to consult w/ Amb Haber of #Germany, Amb Shringla of #India & Foreign Minister Kamilov of #Uzbekistan on the #AfghanPeaceProcess. Getting ready to launch on another mission in hope of making further progress. pic.twitter.com/SyFCveB5vv
— U.S. Special Representative Zalmay Khalilzad (@US4AfghanPeace) July 20, 2019
د افغانستان د ملي یووالي حکومت د اجرائیه ریاست ویاند ازادي راډیو ته وویل چې افغانستان ته د خلیلزاد د تګ په اړه معلومات نهلري.
د امریکا د حکومت خاص استازي تراوسه د وسلهوالو طالبانو له سیاسي استازو سره اووه واره غونډې کړي دي.
هغه د اومې غونډې په پای کې د مشورې او خبرو لپاره واشنګټن ته ولاړ.
سبا به د پاکستان صدراعظم، عمران خان د امریکا د متحدو ایالاتو له ولسمشر، ډونالډ ټرمپ سره وګوري.
د سپیني ماڼۍ په وینا، دواړه به د سیمې پر سوله او ثبات خبرې کوي.
د افغانستان او پاکستان د سیاسي حالاتو د څارونکو له نظره د عمران خان او ډونالډ ټرمپ خبرې به تر ډېره حده د درېیم هېواد، افغانستان پر امنیت او سوله متمرکزې وي.
خو دا نهده څرګنده چې پهدې کتنو کې به خلیلزاد هم وي که نه؟
د پاکستان د بهرنیو چارو وزیر شاه محمود قریشي خبریالانو ته تأیید کړې چې د پاکستان د پوځ لوی درستیز او د هغه هېواد د پوځي استخباراتو د ادارې مشر به هم سپینې ماڼۍ ته پهدې سفر کې له صدراعظم سره ملګری وي.
دا به لومړی وار وي چې په دومره لوړه کچه جنرالان د پاکستان یو صدراعظم سپینې ماڼۍ ته بدرګه کوي.
په واشنګټن کې د جنوبي اسیا د سیاسي چارو پوه ماروین وینبام د پاکستان ډان ورځپاڼې ته ویلي چې دا څرګندوي چې د پاکستان ملکي او پوځي ادارې، تر ډېرې مودې وروسته، بلاخره په یوه لاره روانې شوي دي.
وینبام ویلي چې د افغانستان وضعیت او ترورېزم د امریکا د حکومت دوه سترې اندېښنې دي او هېڅ ستره پرېکړه په پاکستان کې د پوځ له موافقې پرته نه شي عملي کېدلای.
د پاکستان صدراعظم عمران خان مکرراً ټټر وهلی چې د افغانستان د حکومت او طالبانو ترمنځ د سولې د مذاکرو له پېل سره همکاري کولای شي.
د پاکستان د ډاڼ ورځپاڼې په حواله، د پاکستان د پوځ لوی درستیز او د «ای.اېس.ای» مشر به د امریکا د پوځ د لویو درستیزانو د کمېټې له مشر، جنرال مارک ميلي سره هم وګوري.
جنرال مارک میلي څو ورځې وړاندې د امریکا د سنا د وسلهوالو خدماتو کمېټې ته ویلي و چې "له افغانستانه، پهداسې خامي ، زموږ د عسکرو وتل به یوه تېروتنه وي."
په همدې حال کې د امریکا د سنا غړي، لینزي ګراهام د ډونالډ ټرمپ پر اداره غږ کړی چې د طالبانو "نامعقولې" غوښتنې دې نه مني.
لنزي ګراهام د جمعې په ورځ په یوه ټویټ کې لیکلي:"زما هیله دا ده چې د ټرمپ اداره به د طالبانو دا نامعقوله غوښتنه چې په سیمه کې وضعیت ته له پامه پرته، په اتلس میاشتو کې له هغه ځايه ووځي، ونه مني."
How Afghanistan turns out is vitally important to our own national security interests as this is the place it all started on 9/11. We need a good deal, not a fake deal.
— Lindsey Graham (@LindseyGrahamSC) July 19, 2019
لنزي ګراهام د جمهوري غوښتونکي ګوند دی.
سناتور ګراهام لیکلي، موږ اوس له خپلو متحدانو سره کوچنی پوځي حضور لرو چې د القاعده او داعش په څېر ډلو د بیا فعالېدو او د افغانستان د یوځای ساتلو د تضمین پالیسي ده.