ایران د امریکا هغه څرګندونې رد کړې چې وایي، امریکایي سمندري ځواکونو په هرمز تنګي کې یوه ایرانۍ بې پیلوټه الوتکه راغورځولې ده.
د ایران د بهرنیو چارو وزارت مرستیال عباس عراقچي نن پر ټوېټر لیکلي چې تهران نه د هرمز په تنګي او نه په کومه بله سیمه کې خپله بې پیلوټه کشفي الوتکه له لاسه ورکړې.
تر دې وړاندې د ایران د بهرنیو چارو وزیر محمد جواد ظریف وویل چې تهران نن د خپلې کومې کشفي الوتکې د ورک کېدو په اړه معلومات نه لري.
د ایراني رسنیو د راپور له مخې، د دې هېواد د وسله وال پوځ ویاند جنرال ابوالفضل شکارچي نن وویل چې په فارس خلیج او هرمز تنګي کې د ایران ټولې بې پیلوټه الوتکې په خوندي ډول خپلو قرارګاوو ته ستنې شوې دي.
د امریکا ولسمشر ډونالد ټرمپ د پنجشنبې په ورځ په واشنګټن کې وویل، د امریکا USS Boxer جنګي بېړۍ د ایران یوه کشفي الوتکه وروسته له هغه له منځه وړې چې د دې کښتۍ په ۱۰۰۰ مترۍ کې یې الوتنه کوله او دا چې څو ځله یې د کښتۍ له خوا د درېدو سپارښتنې ته پام نه دی کړی.