د دې وېره شته چې د تونس په سواحلو کې به د یوې کښتۍ د ډوبېدو په پېښه کې شااوخوا اتیا تنه کډوال مړه شوي وي.
دا خبره د مهاجرت د نړیوال سازمان IOM ویاند فلاویو دي ګیاسیمو پرون په یوه ټوېټري پیغام کې وکړه.
هغه وویل، د تونس په سواحلو کې د یوې کښتۍ ټوټې موندل شوي او ۴ تنه ژغورل شوي دي.
ژغورل شويو ویلي چې په کوچنۍ کښتۍ یې ۸۶ کسان سپاره وو چې د ده په وینا، د دې وېره شته چې شااوخوا اتیا تنه به مړه شوي وي.
د راپورونو له مخې، یوه ژغورل شوي کس وروسته په روغتون کې ساه ورکړه.
د تونس ساحلي ګارډ ویلي چې دغه کښتۍ له لیبیا ایټالیا ته روانه وه.
په مې میاشت کې هم د تونس ساحلي ښار سفاکس ته نږدې سواحلو کې د یوې کښتۍ د ډوبېدو په پېښه کې لږترلږه اویا تنه مړه شوي وو.