د سعودي عربستان ولیعهد ایران په مستقیم ډول په عمان خلیج کې د تېلو پر ټانکرونو پر حملې تورن کړ او ویې ویل چې هېواد به یې د خپلو خلکو د ګټو پر ضد د هېڅ ګواښ په وړاندې بې ځوابه پاتې نه شي.
شهزاده محمد بن سلمان په یوه مرکه کې چې نن یکشنبه په پان عرب شرق الاوسط ورځپاڼه کې خپره شوې، ویلي چې د ایران رژیم د جاپان د صدراعظم د سفر پروا ونه کړه او په داسې حال کې چې شنزو ابې په تهران کې و، د هغه هڅو ته یې پر دوو ټانکرونو چې یو یې جاپانی و، په حملې ځواب ورکړ.
د سعودي ولیعهد په عین حال کې وویل چې په سیمه کې جګړه نه غواړي، خو که یې د خلکو ګټې له خطر سره مخامخ شي، نو له متقابل اقدامه به ډډه ونه کړي.