په ایران کې د بشري حقونو مدافع زنداني مېرمن نرګس محمدي بېړنیو عملیاتو ته اړتیا لري.
دا خبره پرون د یکشنبې په ورځ د نرګس محمدي وکیل محمود بهزادي ایرنا خبري اژانس ته کړې.
نرګس محمدي د شنبې په ورځ روغتون ته وړل شوې وه او اوس ویل کېږي چې د سختې نسايي ستونزې په خاطر عاجلو عملیاتو ته اړتیا لري.
نرګس له روغتونه ایوین زندان ته انتقال شوې او معلومه نهده چې د عملیاتو اجازه به ورکړل شي که نه؟
نرګس محمدي په ایران کې د بشري حقونو د مدافعینو د مرکز پخوانۍ مشره وه.
دا مرکز په ۲۰۰۱ میلادي کال کې د سولې د نوبل جایزې د ګټونکې شیرین عیادي لهخوا پرانیستل شوی و.
محمدي چې د بشري حقونو د فعالیت په برخه کې یې څو نړیوالې جایزې ګټلي، څو واره مخکې هم بندي شوې وه، خو دا وار د اعدام د سزا پر ضد د یوې ناقانونه ډلې د جوړولو په جرم په ۱۶ کلونو بند محکومه شوې ده.
امنستي انټرنشنل یا د بخښنې نړیوال سازمان د نرګس محمدي د دې سزا علت په ۲۰۱۴ میلادي کال کې د اروپايي ټولنې د بهرني سیاست له پخوانۍ مشرې کټرین اشټن سره د هغې لیدنه بولي.