که څه هم په قطر کې له طالبانو سره د افغان حکومت د استازو او سیاسیونو غونډه په خپل وخت ترسره نهشوه او د بیا جوړېدو یا نهجوړېدو په اړهیې هم دقیق څه نهویل کېږي، خو د افغان حکومت اجرائیه رئیس عبدالله عبدالله د مصالحې د رهبرۍ شورا د موجودیت په دوام ټینګار کوي.
ښاغلي عبدالله د دوشنبې په ورځ «۱۳۹۸ کال د غويي ۰۲» د وزیرانو شورا تر غوندې دمخه رسنیو ته په خبرو کې وویل چې دا شورا د سولې په مذاکراتو کې لکه د قطر په غونډه کې د افغانانو د واحد غږ له تمثیلولو سره مرسته کوي.
دی وايي:
"دا چې د سولې مخامخ خبرو او یا هم مذاکراتو کې لکه د قطر غونډه چې په پام کې وه، د افغانستان د خلکو واحد او برحق غږ تمثیل شي، کومې مشورې مو چې په دې برخه کې درلودې، د هېواد له مشرانو او سیاسیونو سره، زه پهدې باور یم چې د مصالحې د رهبرۍ شورا پهدې برخه کې ډېره ګتوره تمامېدلای شي او موږ سره مرسته کوي."
ښاغلی عبدالله ټینګار کوي چې افغان حکومت به د سولې د مذاکرو په برخه کې خپلو هڅو ته دوام ورکوي.
نوموړي د قطر د غونډې د لغوه کېدو لامل ناسم مدیریت وګاڼه، خو پهدې اړهیې ډېر جزئیات ورنهکړل.
په دې اړه نور: د پخلاینې د شورا د موجودیت اړتیا څه ده؟د مصالحې د رهبرۍ شورا د قطر غونډې ته د تیاریو او مشورې په هدف د افغان حکومت لهخوا جوړه شوه، خو دغه غونډه چې ټاکل شوې وه د روانې میلادي میاشتې له ۱۹مې تر ۲۱ مې نېټې پورې په دوحه کې جوړه شي، ظاهراً د افغان حکومت لهخوا د وړاندې شوي لېست پر سر د اختلافونو او په یاده غونډه کې د افغان حکومتي پلاوي د دریځ د څرنګوالي له امله لغوه او یا هم ځنډول شوې ده.
په خپل وخت د دغې غوندې نهجوړېدو بېلابېل کورني او بهرني غبرګونونه درلودل.
د افغانستان د ولسي جرګې یو شمېر غړي د قطر د ناستې له لغوه کېدو وروسته د پخلاینې شورا د کار دوام اړین نهبولي او وايي چې د دې شورا د کار د دوام پر ځای باید د قطر د ناستې په شکل د بینالافغاني ناستې د جوړېدو هڅه وشي.
د دې جرګې د نړیوالو اړیکو د کمېسیون له غړې ارین یون سره د ازادي راډیو خبریال اکرامالله اکرام مرکه کړې او په سر کې يې ترې د پخلاینې د شورا د موجودیت اړتیا پوښتلې ده.
دا مرکه د لاندې لېنک په کېکاږلو سره اورېدلی شئ:
Your browser doesn’t support HTML5
له اغلې یون سره مرکه
په دې اړه نور: پامپيو: امريکا د قطر د غونډې پر لغوه کېدو خواشيني دهتازه د امریکا د بهرنیو چارو وزارت په خپله اعلامیه کې ویلي چې مایک پامپیو له ولسمشر غني سره په ټیلیفوني خبرو کې د دغه غونډې د لغوه کېدو په اړه خواشیني ښودلې.
په اعلامیه کې راغلي چې مايک پامپيو او ولسمشر غني ومنله چې د دوحې کنفرانس د سولې د پرمختګ لپاره مهم فرصت دى.
د راپورونو پر بنسټ د امريکا د بهرنيو چارو وزارت ټول اړخونه هڅولي چې له موقع په استفاده د کنفرانس د برخهوالو پر سر تفاهم وکړي چې ډېر ژر په قطر کې داسې يو ټول شموله افغاني ډيالوګ ترسره شي.
دغهشان د افغانستان لپاره د روسیې ځانګړي استازي ضمیر کابلوف هم د دغې غوندې د لغوه کېدو په اړه خواشیني څرګنده کړې، خو نوموړي دا هم ویلي چې ستونزمنه ده څو پهدې وپوهېږو چې دا غونډه لغوه شوې که ځنډول شوې ده.
د طالبانو د قطر دفتر ویاند سهیل شاهین بیا فرانسې خبري اژانس ته ویلي چې له امریکايي چارواکو سره به راروان پړاو خبرې له افغانستانه د ټولو امریکايي ځواکونو د وتلو پر مهالوېش متمرکزې وي، خو د غونډې دقیقه نېټهیې نهده ښودلې.
په ورته وخت کې یو شمېر افغان سیاسي کارپوهان وايي، اوس ستونزمنه ده چې د قطر غونډه دې په لنډ وخت کې جوړه شي.
ارشیف، د چارو شنونکی وحید مژده ازادي راډیو سره د مرکې پر مهال, 04Apr2011
د چارو شنونکی وحید مژدهیې په اړه زیاتوي:
"دې ته په پام سره چې ولسمشر هوډ لري، دلته په افغانستان کې د سولې مشورتي لویه جرګه راوبولي او دغهشان روژه هم رانږدې ده، فکر نهکوم چې د دې امکانات موجود وي چې موږ په لنډ وخت کې دا غونډه ولرو."
ټاکل شوې چې د سولې مشورتي لویه جرګه د ثور میاشتې نهمه په کابل کې جوړه شي.
پهدغه غونډه کې چې د سولې عالي شورا په کوربهتوب جوړېږي، د مصالحې د رهبرۍ شورا ډېری غړي هم برخه ولري، کوم چې موجودیتیې د ښاغلي عبدالله په خبره د سولې په مذاکراتو کې د افغانانو د واحد غږ له تمثیلولو سره مرسته کوي.