په کندهار او هلمند کې د وروستیو سېلابونو له امله لږترلږه ۳۲ تنه مړه شوي او زرګونه کورونه زیانمن شوي دي.
د هلمند د والي ویاند عمر ځواک ویلي چې ۶ تنه په ناوې ولسوالۍ او ۶ تنه په لښکرګاه کې مړه شوي او اته تنه نور ټپیان دي.
د ځواک په وینا، سېلابونو شااوخوا دوه زره کورونه ویجاړ یا زیانمن کړي دي.
د هلمند په څنګلوري کندهار ولایت کې بیا د ملګرو ملتونو د بشري مرستو د همغږۍ ادارې اوچا د سېلابونو له امله د مړو شویو شمېر لږترلږه ۲۰ تنه ښودلی او ویلي یې دي چې په پنځو ولسوالیو کې ۱۰ تنه تر اوسه لادرکه دي.
اوچا دغهراز په کندهار کې هم د سېلابونو له امله د شااوخوا دوه زره کورونو د ویجاړېدو خبر ورکړی دی.
په افغانستان کې سږ ژمی په تېره بیا وروستیو څو ورځو کې ډېرې واورې او بارانونه وورېدل.