د افغانستان کرنیز محصولات د متحده عربي اماراتو د دُبۍ ښار په نندارتون کې ایښودل شوي دي.
دا پنځه ورځنی نندارتون پرون د دُبۍ په سوداګریز مرکز کې پرانیستل شو.
د افغانستان د کرنې د وزارت ویاند اکبر رستمي له دُبۍ څخه ازادي راډیو ته وویل، دا نندارتون د افغان محصلاتو لپاره د بازار موندنې ډېر ښه فرصت برابروي.
ښاغلی رستمي زیاتوي:
"پهدې نندارتون کې داخلي شرکتونه وو چې مېوې، زعفران او لبنیاتیې نندارې ته وړاندې کړي دي. د نندارتون په لومړۍ ورځ د افغانستان زعفرانو، وچې مېوې او تورو جلغوزیو د بهرنیو پانګهوالو او سوداګرو پام ځان ته واړوه."
د ښاغلي رستمي په خبره تمه ده چې پهدې نندارتون کې د افغان او نړیوالو سوداګرو ترمنځ د ۵۰ میلیونه ډالرو په ارزښت قراردادونه وشي.
د دې نندارتون په پرانیست غونډه کې د افغانستان د کرنې وزیر نصیر احمد دُراني، د سوداګرۍ او صنعت د خونې مسؤلانو او د یو اېس ای ډي یوه استازي ګډون کړی و.