د يونان پارلمان په ناټو کې د ګاونډي هېواد مقدونيا د يوځاى کېدو پر پروتوکول مباحثې پيل کړې.
ويل کېږي له دې سره به د دواړو هېوادونو ترمنځ د څو لسيزو د لانجې ختمېدو زمينه برابره شي.
مقدونيا چې د پخوانۍ يوګوسلاويا جمهوريت دى، تېر ميلادي کال له يونان سره موافقه وکړه چې نوم به يې د شمالي مقدونيا په جمهوريت بدل شي.
د دواړو هېوادونو پارلمانونو له وړاندې د نوم بدلولو دغه موافقه تصويب کړې ده.
يونان پر دغه نوم ځکه انتقاد درلود چې يو ولايت يې په همدغه نوم دى.
تمه کېږي چې د يونان پارلمان به نن ناوخته په دې اړه رأيه اچونه وکړي.