په فراه کې د افغان ځواکونو د هليکوپتر د سوځېدو په پېښه کې پنځه تنه وژل شوي دي.
د افغانستان دفاع وزارت وايي، دا هليکوپټر له شینډنډ څخه فراه ته روانه وه چې د خاک سفید په رنج سیمه کې یې بېړنۍ ناسته وکړه.
د دفاع وزارت یوه خپرپاڼه وايي، په پېښه کې د الوتکې د پیلوټانو په شمول پنځه تنه عمله وژل شوي دي.
طالبانو ادعا کړې چې دوی دا هليکوپتر ویشتلې ده، خو دفاع وزارت وايي، سیمې ته یې تخنیکي هیئت استولی، څو د هليکوپټرې د بېړنۍ ناستې او اور اخیستو علت څرګند شي.