د کندهار د پوهنې چارواکي وايي، سږ کال به په دغه ولایت کې ۶۰ زره نوي زدهکوونکي ښوونځیو ته جذب شي.
ټاکل شوې ده چې نن د سنبلې د مياشتې پر ۱۵مه نېټه په کندهار او نورو ګرمسیرو ولایتونو کې نوی تعلمي کال پیل شي.
لا هم د کندهار د پوهنې پر پڅ بهير باندې ګڼې نيوکې موجودې دي.
د کندهار د پوهنې رياست مسؤلین وایي چې د نوي تعلمي کال له پېل وړاندې يې د يو شمېر ښوونځيو ودانۍ ترميم کړي، د ښوونکو د ظرفيتونو د لوړوالي پروګرامونهيې عملي کړي او د ورکول شوي هدف له مخې به سږ کال د کندهار په کچه ۶۰ زره نوي زدهکوونکي ښوونځيو ته جذب کړي.
د کندهار د پوهنې رياست د نشراتو مسؤل نظر محمد صميمي وایي، د نویو زدهکوونکو د جذب پروسه د کندهار په ټولو ښوونځیو کي سره له اوسه پیل شوې ده.
نوموړي زیاته کړه:
"د نوي تعليمي کال د پیل لپاره چمتووالی نیول شوی، زموږ هدف ۶۰ زره نوي زدهکوونکي دي چې دا به په نوي تعلیمي کال کې د کندهار ښار او ولسوالیو په مکاتبو کې شمولیت اخلي."
صميمي وایي، د تېر تعلمي کال په جريان کې وتوانېدل چې په کندهار ښار او ولسواليو کي ۳۰ بابه تړلي ښوونځي بيا د زدهکوونکو پر مخ خلاص کړي، خو په خبرهیې چې لا هم په کندهار کې ۱۲۰ ښوونځي د زدهکوونکو پر مخ د کم تشکيل او د ودانیو د نشت له امله تړلي پاتې دي.
نوموړی وایي، سږ کال به بيا هم دوی د مرسندويه بنسټونو سره په ګډه په ولسوالیو کې د بندو ښوونځيو پر خلاصولو کار وکړي.
کندهار په خپل تشکيل کې ټول ۴۷۰ ښوونځي لري چې ۱۲۰یې د پوهنې رياست د مسؤلينو په وینا د کمو امکاناتو له امله د زدهکوونکو پر مخ تړلي دي.
په کندهار کې ۱۲۰ ښوونځي د بېلابېلو لاملونو له مخې د زدهکوونکو پر مخ بند دي.
که څه هم د پوهنې رياست مسؤلين د نوي تعلمي کال د پیل لپاره د پوره چمتووالي خبره کوي، خو لاهم د کندهار د پوهنې پر پڅ بهير باندې ګڼې نيوکې موجودې دي.
راپور: صادق رښتینی