د امریکا د بهرنیو چارو مرستیال وزیرې الېس ولز د افغانستان په مشرۍ د سولې له پروسې د خپل هېواد په ملاتړ او د افغان جګړې په سولهییزې پای ته رسېدو ټینګار کړی دی.
هغې پرون له افغان لوړپوړو امنیتي او ملکي چارواکو سره په لیدنه کې دا مسایل یاد کړي دي.
په کابل کې د امریکا سفارت د مېرمن ولز د لیدنو په اړه یو بیان خپور کړی او ویلي یې دي چې هغې د افغانستان د ملي امنیت له سلاکار حنیف اتمر، د بهرنیو چارو وزیر صلاحالدین رباني او د سولې شورا له رئیس کریم خلیلي سره لیدلي دي.
اخوا د افغانستان د ملي امنیت شورا په یوه اعلامیه کې ویلي چې د ملي امنیت سلاکار حنیف اتمر د جنوبي اسیا په چارو کې د امریکا د بهرنیو چارو له مرستیال وزیرې الېس ولز سره په لیدنه کې په سیمهییزو همکاریو او د افغان حکومت د سولې په پروګرام خبرې وکړې.
دواړو لورو په بروکسل کې د ناټو د غونډې د چمتووالي په اړه خبرې کړې دي.