د سمنګان د ولایتي شورا استازي شکایت لري چې دې ولایت کې څه باندې ۶۰ ښوونځي ودانۍ نهلري، ذکور او اناثیه زدهکوونکې تر خیمو لاندې زده کړې کوي.
د سمنګان د ولایتي شورا مشر حاجي راز محمد ازادي راډیو سره په خبرو کې وویل چې په سمنګان ولایت کې د نسبتي امنیت د شتون له امله، دلته هېڅ ښوونځی د زدهکوونکو پر مخ نهدی بند، خو لا هم لسګونه ښوونځۍ ودانۍ نهلري.
د سمنګان د ولایتي شورا مشر پهدې اړه وویل:
"د سمنګان په مرکز او ولسوالیو کې ۶۰ ښوونځي ودانۍ نهلري، ماشومان تر خیمو لاندې زدهکړې کوي، دولت باید یادې مسئلې ته جدي پام وکړي."
د سمنګان د ولایتي شورا مشر حاجي راز محمد
د سمنګان د ولایتي شورا مشر وايي چې د ناوړه دودونو د حاکمیت له امله لا هم د سمنګان ولایت په یو شمېر سیمو کې کورنۍ خپلې ځوانې نجونې ښوونځي ته له ورتګه منع کوي او په یو شمېر نورو سیمو کې بیا د مسلکي ښوونکو کمښت موجود دی.
په همدې حال کې د سمنګان د والي ویاند هم دې ولایت کې د ښوونځیو لپاره د ودانیو نشتون تأییدوي او وايي چې د یادې ستونزې د حل په موخه یې مرکزي دولت ته یو شمېر وړاندېزونه استولي او هیلهمند دی چې ګڼ شمېر ښوونځیو ته د ودانۍ د جوړولو په برخه کې ډېر ژر اقدامات ترسره شي.
د سمنګان د والي ویاند صدیق عزیزي وايي چې د بې ودانۍ ښوونځیو شمېر تر هغه ډېر دی کوم چې د ولایتي شورا استازي یې ادعا کوي.
هغه پهدې اړه وویل:
"هغه ښوونځي چې ودانۍ نهلري شمېر یې تر هغه ډېر دی، کوم چې د ولایتي شورا غړو یې ادعا کړې ده. خو په روان کال کې به ۱۵ ښوونځو لپاره ودانۍ جوړولو باندې کار پیل شي."
په عین وخت کې د سمنګان د ښوونځیو یو شمېر زدهکوونکي وايي چې ښوونځیو ته یې د ودانۍ د نشتون ترڅنګ د هغوی بله اساسي ستونزه د څښاک صحي اوبو نشتون دی.
د ایبک ښار د فاطمه الزهرا اناثیه ښوونځي زدهکوونکې یې په اړه وايي:
"زما نوم رخسار دی، د سمنګان په ښوونځیو کې لومړی دا چې ټولګي تر خیمو لاندې دي او دوهم دا چې موږ د څښاک صحي اوبو ته لاس رسی نهلرو. هغه اوبه چې زدهکوونکي ترې ګټه اخلي، غیر صحي دي، زموږ د اوبو ستونزه باید حل شي.
-ثریا یم، زموږ په ښوونځي او د ایبک ښار په نورو ښوونځیو کې د څښاک اوبه نشته، دولت یادې مسئلې ته هېڅ پام نهلري، هغه اوبه چې موږ ترې ګټه اخلو، صحي نهدي او ناروغوي مو."
دا پهداسې حال کې ده چې د سمنګان په ګاونډیو ولایتونو بلخ، سرپل او بغلان کې هم د معارف ریاست چارواکي ادعا کوي چې یادو سیمو کې لسګونه ښوونځي ودانۍ نهلري او زدهکوونکي تر زړو خیمو لاندې په زدهکړو بوخت دي.
راپور: مجیب الرحمن حبیبزی - سمنګان