د افغانستان د کرنې او مالدارۍ وزارت وايي، په پام کې ده چې د کندهار ولایت نه ۲۰ زره ټنه پنبه پاکستان ته صادره شي.
د دغه وزارت ویاند اکبر رستمي نن ازادي راډیو ته وویل چې د پاکستان او افغانستان ترمنځ د نوې هوکړې له مخې، دغه پنبه به لومړی په کانټینرونو کې ځای پر ځای او بیا به پاکستان ته صادره شي.
د ښاغلي رستمي په خبره دغه پنبه باید څو میاشتې مخکې هغه هېواد ته صادره شوې وی، خو وايي د پاکستان له لوري له یو لړ ستونزو د رامنځته کېدو له امله، ځنډېدلې وه.
رستمي وايي، پر پنبې سربېره په پام کې ده د افغانستان ځیني کرنیز محصولات چې ارزښتیې میلیونونه ډالرو ته رسېږي، پاکستان ته صادر شي.