د کونړ پر دانګام ولسوالۍ په تېرو ۲۴ ساعتونو کې یو ځل بیا پاکستانیو ځواکونو ۱۵۴ د توپونو ګولۍ راویشتلي.
د سیمې خلک وايي چې پاکستاني ځواکونه ځکه ډزې کوي چې د ډیورند پرکرښه يې د پوستو جوړولو او اغزن تار غځولو چارې پیل کړي، څو د افغان حکومت او خلکو پام ډزو ته واړوي او دوی اغزن تار وغځوي او پوستې جوړې کړي.
د سیمې اوسېدونکي وايي، یو ځل يې پاکستاني ځواکونه شړلي، خو اوس يې بیا ډزې پیل کړې دي.
د کونړ اوسېدونکي وايي، ۷ کاله وشول چې د دوی پر خاوره او کورونو د پاکستان پوځ د توپونو او نورو درنو وسلو ډزې کوي او اوس يې هڅه پیل کړې چې د دغو ډزو په جریان کې د ډیورند پر فرضي کرښه امنیتي پوستې جوړې او اغزن تارونه وغځوي.
بل خوا د کونړ د والي ویاند عبدالغني مصمم هم وايي چې د پاکستانیو ځواکونو توپچي بریدونه دوام لري او د پوستو جوړولو چارې یې پیل کړې وې، خو هغه اوس د ولس په مرسته بندې شوې دي.
حکومتي مسؤلین وايي، نه غواړي چې د پاکستانیو ځواکونو په څېر دوی هم ړندې ډزې وکړي او د پولې بلې غاړې ته خپل وروڼه وولي او هغوی ته ستونزې پیدا کړي.